او محبتده ملال یوخ،
اوردا حال دیر، داها قال یوخ!
گئجه لر اوردا گوموش دن دی، قیزیلدان نه گونوزلر،
نه زمرد کیمی داغلاردی، نه مرمر کیمی دوزلر،
نه ساری تئللی اینکلر، نه آلاگؤزلو اؤکوزلر،
آی نئجه آی کیمی اوزلر!
گول آغاجلاری نه طاووس کیمی چترین آچیب الوان،
حله کروانیدی، چؤللربزه نر سورسه بو کروان،
ده وه کروانیدی، دا داغلار، یوکو اطلس دی بو حیوان،
(صابر)ین شهرینه دوغرو، قاطاری چکمه ده سروان،
او خیالیمداکی (( شروان ))!
اورداقاردا یاغار، امما داها گوللر سولا بیلمز،
بو طبیعت، او طراوتده محال دیر، اولابیلمز،
عمر پیمانه سی اوردادولابیلمز.
او افقلرده باخارسان نه ده نیزلر، نه بوغازلار،
نه پریلر کیمی قولار، قونوب اوچماقدانه قازلار
گؤلده چیممکده نه قیزلار.
بالیق اولدوزکیمی گؤللرده، دنیز لرده پاریلدار،
آبشار مرواری سین سئل کیمی تؤکدوکده خاریلدا،
یئل کوشولدار، سو شاریلدار.
قصرلر واردی قیزیلدان، قالالار واردی عقیق دن،
(رافائیل) تابلو سوتک، صحنه لری عهد عتیق دن،
دویماسان کؤهنه رفیق دن.
جنتین باغلاری تک، باغلاری نین حور و قصوری.
دوزولوب غرفه ده، بالقوندا جواهر کیمی حوری،
الده حوری لری نین جام بلوری،
تونگونون گول کیمی ((صهبای طهوری))
نه ماراقلارکی،آییق گؤزلره رؤیادی دئیرسن،
اویدوران جنت مأوادی دئیرسن!
زهره نین قصری بریلیان، حصاری نرده سی یاقوت،
قصر جادودی، مهندسلری هاروت ایله، ماروت،
اوردا (مانی) دایانیب قالیمش او صورتلره مبهوت،
قاپی قوللو قچو سو هاروت!
اوردا شعرین، موزیکین منبعی سرچشمه دی قاینار،
نه پریلر کیمی فواره دن افشان اولوب اوینار،
شاعر آنجاق اونو آنلار!
دولو مهتاب کیمی استخردی فواره لر ایله،
ملکه اوردا چیمیر، آی کیمی مهپاره لر ایله،
گوللر گوشواره لر ایله.
شعر و موسیقی شاباش اولمادا، افشاندی پریشان،
سانکی آغ شاهی دیر اولماقدا گلین باشینا افشان،
نه گلین لرکی نه انلیک اوزه سورترله، نه کیرشان،
یاخا، نه تولکو، نه دووشان!
آغ پری لر، ساری کؤینکلی بولود لاردان انیرلر،
سود گؤلونده ملکه ایله چیمیرکین سئوینیرلر،
سئوینیرلر، اؤیونورلر.
قاوزاناندا هره الده دولو بیرجام آپاریرلار.
دریا قیزلارینا پیغام آپاریرلار.
ده نیزین اؤرتوگو ماوی، اوفوقون سقفی سماوی،
آینا دیر هرنه باخیرسان: یئراولوب گؤی له مساوی،
غرق اونون شعرینه راوی.
غرفه لر، آی بولود آلتیندا اولارتک گؤرونورلر،
گؤز آچیب –یومما، چیراغلارکیمی یاندیقدا سؤنورلر،
صحنه لر چرخ فلک تک بورولوب گاه دا چؤنورلر،
کؤلگه لیکلر سورونورلر.
زهره ایواندا الاهه شینئلینده گؤرونرکن،
باخاسان حافظی ده اوردا جلالتله گؤره رسن،
نه سئورسن.
گاه گؤرن حافظ شیراز ایله بالقوندا دوروبلار،
گاه گؤرن اورتادا شطرنج قورارکن اوتوروبلار،
گاه گؤرن سازیله –آوازیله اگلنجه قوروبلار،
سانکی ساغرده و وروبلار.
((خواجه)) الحان اوخویاندا، هامی ایشدن دایانیرلار،
او نوالرله پری لر گاه اویوب، گاه اویانیرلار،
لاله لر شعله سی، الوان شیشه رنگی بویانیرلار.
نه خومار گؤزلو یانیرلار.
قاناد ایستر بو افق، قوی قالا طرلانلی سهندیم،
ائشیت أوز قصه می، دستانیمی، دستانلی سهندیم:
سنی ((حیدربابا)) اول نعره لری له چاغیراندا،
او سفیل داردا قالان، تولکو قووان شئر باغیراندا
شیطانین شیللاغا قالخان قاطیری نو خداقیراندا،
((بابا گور گور)) سسین آلدیم، دئدیم: آرخامدی، ایناندیم.
آرخا دوردوقدا (( سهندیم)) ساوالان تک هاوالاندیم،
سئله قارشی قووالاندیم.
(جوشغونون) دا قانی داشدی، منه بیر هایلی سس اولدی،
هر سسیز بیر نفس اولدی
(( باکی)) داغلاری دا، های وئردی سسه، قییها اوجالدی
اوتایین نعره لری سانکی بوتایدان دا باج آلدی،
قورد آجالدیقدا قوجالدی.
(راحمین)نعره سی قووزاندی، دئیه ن توپلار آتیلدی،
سئل گلیب نهره قاتیلدی
(رستمین) توپلاری سسلندی دئیه ن بوملار آچیلدی
بیزه گول –غنچه ساچیلدی.