زینبم اودلارا یاندیم گلدیم
کوفه وشامی دولاندیم گلدیم
دولانوب عطروی آلدیم گلدیم
زینبون عطروه قربان یارالی
بو گوزل قبریوه قربان یارالی
نجه کی عهدیمه پیمان الدیم
حقووی عالمه اعلان الدیم
ظلم ایوین شامده ویران الدیم
ثابت ایتدیم که جهالت ده دیلر
ئوزلری بولدی ذلالت ده دیلر
شهدا خط سعادت ده دیلر
بس که گلدور شهدانون هره سی
ایله بیر سیر گلستان هوه سی
قبروون وار نه گوزل منظره سی
گلشنونده یره گللر دوشنوب
باجون اولسون نیه شش پر دوشنوب
ایاقون آلتنا اکبر دوشنوب
دود و آهیم اسفیم عرشه چاتوب
باشیمی بو سوزوون فکری قاتوب
ده گوروم صودامرون هاردا یاتوب
دیمم ای گل ثمروندن ده منه
دیمورم بال و پروندن ده منه
یارالی یاره لروندن ده منه
گوروروم آتش عشقه یانوسان
من کیمی در اودونا اودلانوسان
گوزون آچ زینبووی گور تانوسان
دیموسن سلسله غم هانی بس
بلبل گشن طاها هانی بس
دیموسن نازلی رقیه هانی بس
او گجه گوز یاشون احسان ویردی
گوزوم اشکین یرینه قان ویردی
الیم اوستونده بالم جان ویردی
جان ویرنده منه بیر باخدی بالام
قلبیمه آتش غم یاخدی بالام
ایله بیل ئولدوزودی آخدی بالام
دیددیم ای نو گل گلزار کرام
ندی دردون منه ده نازلی بالام
دیدی آهسته منه عمه آجام
رخت عیشی او زمان سویدوم حسین
دیریلیقدان داخی من دویدوم حسین
یوزومی گل یوزینه قویدوم حسین
خط سیریمده دیمه آخدیم حسین
او شیرین دیل بالانی آتدیم حسین
بالامین قبرین اوزوم قازدیم حسین
قبری قازدوقجا اونا وای دیمشم
اشک چشمیم آخوب ای وای دیمشم
بالاما قبریده لایلای دیمشم